நன்றி வாசு, சுகுணா, விகடன்!

சற்றேறக்குறைய பதினைந்து நாட்களுக்கு முன்பு அகநாழிகை வாசுவிடம் அழை பேசியபோது,"சுகுணாதிவாகர்" உங்கள் அழை எண் கேட்டார். கொடுத்துருக்கேன். ஆ.வி.யில் காதலர் தினத்திற்கு கவிதைகள் எழுதி அனுப்ப சொன்னார்" என்றார்.

சுகுணாவை தொடர்பு கொண்டேன். திங்கள் கிழமைக்குள் எழுதி அனுப்பி தாருங்கள் என்றார். அனுப்பி இருந்தேன். ஐந்து கவிதைகள் தேர்வு. மிகுந்த சந்தோசம். அதில் ஒரு கவிதை அட்டையிலும்.

காதல் குறித்து எழுத யாருக்குத்தான் விருப்பம் இருக்காது! மகள் கல்யாணத்திற்கு நிற்கிற காலத்திலும் காதல் குறித்து எழுத வாய்த்திருக்கிறது. அவ்வளவு உன்னதம் இந்த காதல்!

காதல் அங்கேயேதான் இருக்கிறது. போட்டது போட்டபடி, நாம்தான் நகர்ந்து விடுகிறோம். இல்லையா..?

மிகுந்த நன்றியும் அன்பும் வாசு,சுகுணா,விகடன்!

இனி பிரசுரமான கவிதைகள்.

அட்டையின் கவிதை...

நீ விரும்பி விளையாடும் பொம்மை என்பதால்
பத்திரமாய் வைத்திருக்கிறேன் என்னை.

உள்ளே..

நீ நடந்த தடங்களின் அடியில் தான்
கிடக்கிறது நம் மணல்
மணல் என்றால் மணல்
மனசென்றால் மனசு!

ஜன்னல் வழியாக
பார்த்துக் கொண்டிருந்தாள்
காலைக் கோலத்தில் சிந்திய
சைக்கிள் மணிச் சத்தத்தை!

கொஞ்சூண்டு தான் இருந்தாள்
யாருக்கும் தர முடியாத
காதலாக இருந்தாள்!

காதலுக்கு அர்த்தம் கேட்டார்
கடவுள்
என்னைக் காட்டினேன்
காரணம் கேட்டார்
உன்னைக் காட்டினேன்.