இவனே திரையிடும் இவன் படம்

(picture by cc license thanks Nesster)

தத்தக்கா பித்தக்காவென
ஓடி வருகிற குழந்தையொன்று
நடந்து போய்க் கொண்டிருப்பவனின்
காலை கட்டிக் கொள்கிறது.

சோற்று கிண்ணத்துடன்
விரட்டி வருகிற அம்மாக்காரி
ஸ்தம்பித்து நிற்கிறாள்.

குனிந்து
குழந்தையை தூக்கிக் கொள்கிறான் இவன்.

கீச் கீச் என கத்தியபடி
கழுத்தை இறுக்குகிற குழந்தை
பிடித்திருக்கிறது இவனுக்கு.

பிச்சு பறிக்க இயலாமல்
புன் முறுவலில் இருந்து
வாய் விட்டும் சிரிக்கிறாள் அம்மாக்காரி.

நயந்து பேசி குழந்தையை
பிரிக்கிறான் இவனிடமிருந்து.

பிறகு
பஸ்ஸ்டாண்ட் வந்து விடுகிறது.

ஒவ்வொருவராய் இறங்கி
தான் இறங்க தாமதமாகுமே என
உள்ளதிலேயே சிறிய வேறொரு
கூடா விருப்பை ஓட விடுகிறான்.

அதில்,
இவனுடன் பஸ்ஸில் வந்த சுடிதார்காரி
"டைம் என்ன சார்?"
என தொடங்குகிறாள்.