ரெண்டுங்கெட்ட கவிதைகள்

ஒன்று


(Picture by cc licence, Thanks Christian Haugen)

அவளும் இவளும் வழியில்
அவனும் இவனும் எதிரில்.

கடந்த பிறகு,
அவள் சொல்வாள் இவளிடம்
மெதுவா திரும்பிப் பாரேன்
திரும்பிப் பார்ப்பான் பாரு.

அவன் கேட்பான் இவனிடம்
டக்குன்னு திரும்பிப்பார் மாப்ள
பார்க்கிறாளான்னு?

ஆக,

அவளும் அவனும் பார்க்கவில்லை
இவனும் இவளும் பார்க்கிறார்கள்

இனி,

இவர்களுக்காக அவர்கள்
திரும்பித் தொலைப்பார்கள்.

***

இரண்டு



(Picture by cc licence, Thanks Abhisek Sarda)

முப்பிரி சனலை மூட்டி
ரயில் வண்டி ஓட்டிய அனுபவம்
தந்ததோ என்னவோ
ரயில் டிரைவர் ஆசையை.

பை நிறைய முருக்கு அதிரசம்
வாங்கி வருகிற D.முருகன் அப்பாவை
பார்த்த பிறகு ரோடு ரோலர் ஓட்டுனராக
பிரியம் கொண்டிருந்தேன்.

மெய்யரக்கா மகன் பழனி மாதிரி
பேசாமல் ஆடு மேய்ச்சுக்கிட்டு இருந்திருக்கலாம்
என்ற நினைவிற்கு ராமலிங்க வாத்தியாரின்
புளியங்குச்சிதான் காரணமானது.

முப்பிரி சனல்
முருக்கு அதிரசம்
புளியங்குச்சி மாதிரியே
மஞ்சள் பத்திரிக்கையும்
காரணமாச்சு ஒரு நாள்,

லேடீஸ் டைலராக
விரும்பிய கனவிற்கு.

***