துக்கம்

செல்வநாயகம் செத்துப்போனது அறியாது

"செல்வா நல்லா இருக்கானா?" என்றேன்

அவனின் மனைவியிடம்.

இதில் அவளை விட

எனக்கு துக்கம்.

"அண்ணே மல்லிபூ அண்ணே" என்று

தினமும் விசாரிக்கிற ரயிலடி பூக்காரி

இன்று என்னை தவற விட்டாள் எதனாலோ

இதில் என்னைவிட

அவளுக்கு துக்கம்.

மனைவியின் சேலையணிந்த

மனைவியின் தங்கையை

மனைவி என கை நீட்டிய குசும்பிற்கு

இரவெல்லாம் வெட்கி கிடந்த

துக்கம் எனக்கு.

பாவம் அதுக்கென்ன பாடோ?..

மனைவியின் தங்கை முதற்கொண்டு,

ரயிலடி பூக்காரி, செல்வா மனைவி வரையில்

"எல்லா நேரமும் போலவா

எல்லா நேரமும் இருக்கும்" என்று

தெரிந்து வைத்திருந்தால் தேவலாம்தான்.

எனக்கு தெரிந்ததுபோல்

(கணையாழியில் வெளியான எனது கவிதை)