தொடர்பதிவு - 2: வரம் கொடு தேவதையே

இது நம்ம வசந்த் product! நவாஸ் மெயின் டீலர்!போட்டு தாக்கிட்டாரு நம்மளை. நீங்க ரெண்டு பேரும் கியாரண்டின்னா... கேட்டுரலாம் பத்து வரத்தை!

வரம் ஒன்று:

அமுதா கொட்டகைக்கும் கிராமத்துக்கும் 3கி.மீ...குறுக்கு வழியாய் அப்பா அழைத்து போனார். பாதி தூரத்தில் நடக்க முடியலைன்னு அப்பா தோளில் தூக்கிகொண்டார். மார்பில் இல்லை. தோளில்! தலை மறைக்கும்ன்னு மணல் குவித்து அமர்த்தினார். துவாரத்தில் இருந்து பீச்சும் ஒளியை திரும்பி, திரும்பி பார்த்தபடி பார்த்த அந்த முதல் திரைப்பட நாளை திருப்பி தர சொல்லுங்க வசந்த்!

வரம் ரெண்டு:

ராமேசுவரத்தில், தாத்தா ஒருவரின் ஷஷ்ட்டியப்த்த பூர்த்தி. பசிக்குதுன்னு அம்மாவிடம் அழுதேன். அந்த அறையில் போயி, அர்ச்சனைக்குன்னு வைத்திருந்த தட்டில் இருந்த ஒரு வாழைப்பழத்தை அம்மா எடுத்தாள். யாரோ வர, அம்மா மீண்டும் அந்த தட்டிலேயே போட்டாள். பிள்ளை பசிக்கு அம்மா திருடக்கூட செய்வாள் என்றுணர்ந்த அந்த நாளை திருப்பி தர சொல்லுங்கள் நவாஸ்.

வரம் மூன்று:

கிணற்றடி முற்றத்தில், வானம் பார்த்தபடி முனியம்மாள் அக்காவை கட்டிக்கொண்டு, கதை கேட்ட கதைகளில் ஒரு கதையை உங்கள் தேவதையை சொல்ல சொல்லுங்கள் வசந்த்.

வரம் நான்கு:

வெங்கடேஸ்வர ஐயர் வீட்டில் இருந்து மாங்காய் திருடி, ஊறுகாய் போட்டு வைத்துக்கொண்டு செல்வராஜுடன் தின்ற எவ்வளவோ நாட்க்களில் ஒரு நாளை தேவதையிடமிருந்து வாங்கி கொடுங்க நவாஸ்.

வரம் ஐந்து:

அஞ்சாவது படிக்கிறேன் அப்போ... ராஜ்மோகனுடன் செட்டி ஊரணி கரை வழியாக பள்ளி செல்லும் போது இரண்டு ஆடுகள் விளையாடிக்கொண்டிருந்தது. அம்மா அப்பா விளையாட்டு!.. அன்று அவன் சொல்லித்தான் தெரியும். முதல் நாள் வரையில் தாலி கட்டினால் போதும், குழந்தை பிறந்திரும் என்று நம்பிக்கொண்டிருந்த அந்த அப்பாவி சிறுவனை திருப்பி தர சொல்லுங்கள் வசந்த்!

வரம் ஆறு:

"ரொம்ப பாக்காதீங்க மாமா.. அப்புறம் சலிச்சு போயிரும்" என்று சிரித்தபடி சொல்லி போனாள் அவள். அந்த முதல் காதலின் முதல் நாளை திருப்பி தர முடியுமா இல்லையான்னு கேளுங்க நவாஸ்.

வரம் ஏழு:

மடியில் மகளை கிடத்தி, "நட்சத்த்திரம்படி அகிலாண்டமுன்னு எழுதுங்கோ" என்று கேட்டுக்கொண்ட புரோகிதரின் முன்னில் இருந்த நெல்லில், கண் நிறைந்து அவள் பெயரை எழுதிய அந்த நாளை திருப்பி தராட்டி நியாயம் இல்லை வசந்த்.

வரம் எட்டு:

"ஏங்க,.. சுந்தர் வந்துட்டு போச்சு" என்று லதா சொல்கிற போதெல்லாம்,"ஐயோ"என்பேன். (இருபது வருடத்திற்கு முந்தைய ஜோக்கா சொல்வான், அதுனால..) எனக்கு நிறைய நண்பர்கள். அவனுக்கு நான் மட்டும். சென்னையில் அவனுக்கு வேலை. எப்போ ஊர் வந்தாலும், பெட்டியை வீடு வைத்த கையோடு வீடு வருவான். ஒரு நாள் தூங்கி எழுந்த போது என் அருகில் படுத்து தூங்கி கொண்டிருந்தான். "இவன் எப்ப புள்ளை வந்தான்" என்று இவளை கேட்டேன். "அப்பதையே வந்திருச்சு,.. எழுப்ப வேணாமுன்னு சொல்லிட்டு படுத்துச்சு, தூங்கிருச்சு போல" என்று சொன்னாள் லதா. ஹிருதயத்தில் ஓட்டை என்று ஒரு நாள் இறந்து போனான்.

"ஏங்க..சுந்தர் வந்துட்டு போச்சுன்னு" ஒரு தடவை லதாவை சொல்ல சொல்லுங்க நவாஸ். என்ன நவாஸ் நீங்க..

வரம் ஒன்பது:

ஆனந்த விகடனில் கவிதை பிரசுரமானதிற்கு முன்னூறு ரூபாய் மணியாடர் வந்தது. "சேலைக்காரர்ட்ட பழைய பாக்கியை கொடுத்துட்டு ஒரு சேலை எடுத்துக்கட்டா" என்று கேட்டாள் லதா, "எப்ப பாரு என்னதான் அப்படி எழதி கிழிக்கிரீர்களோ" என எப்பவும் கேட்க்கிற லதா! அந்த நாள் அவசியம் வேணும் வசந்த்!

வரம் பத்து:

சவுதி வந்த பிறகு, "சசி சைக்கிள் ஓட்டுறான்க" என்று லதா தொலை பேசியில் அழைத்தாள் ஒரு நாள்."யார்புள்ளை பழகி கொடுத்தது" என்று கேட்டதற்கு, "நான்தான் ராஜாஸ்கூல் க்ரவுண்டுக்கு கூட்டிட்டு போயி பழகி கொடுத்தேன்" என்றாள். கண் கலங்கி விட்டது. பிள்ளைக்கு சைக்கிள் பழகி தர்றது எல்லாம் நம்ம டூட்டி நவாஸ். அது இப்பதான் சமீபமா. ஒரு பட்டனை தட்டினா ரீவைண்ட் ஆயிரும். கேட்டு பாருங்க நவாஸ். போயிட்டு வந்திர்றேன்..

என்ன பேசமாட்டைங்கிறீங்க ரெண்டு பேரும்?

வசந்து கொசந்து!

நவாசு கொவாசு!

க. பாலாஜி, ஆருரன் விசுவநாதன், தமிழ் நாடன், சந்தான சங்கர் இவர்கள் வீடுநோக்கி அனுப்புகிறேன் இந்த தேவதையை.

நன்றியும் அன்பும் மக்கா!

அன்புடன்,

பாரா