இலையுதிர்காலம்

ஊர் வேறு மாதிரியாக இருந்தது.

பருகி துய்த்த வெயில்

பார்வைக்கு கிடைக்கவில்லை.

பழகிய தெருக்கள்

புறந்தள்ளியது.

செங்கொன்றை மரங்களில்

இலை கூட இல்லை.

எங்கு தேடியும் கிடைக்கவில்லை

இலங்தம்பழம் விக்கிற எவரையும்.

வாசல் கோலத்தை நசுக்கி செல்கிறது

சிந்தாமணி சிற்றுந்து.

வெறும் காட்டாமனுக்கு செடியிலிருந்து

கூவியழைக்கிறது

அரசிலோ வேம்பிலோ

இருந்தழைக்கும் குயில்.

மிதியடிகள் போன்று மதிக்கப்படுகிறார்கள்

முன்பு அப்பாவாய் இருந்த

தாத்தாக்கள்.

முதுகிற்கு பின்புறம் மறைகிற

குழந்தைகளை முன்னிழுத்து

"சித்தப்பாடா" என்று

கண்ணீருடன் சிரிக்கிறார்கள்

காதலிகள்.

அவ்வளவையும் காரணமாக்கி

சாராயத்தில் குளிக்கிறோம்

சவுதியிலிருந்து திரும்பும்

நாங்கள்.