காட்சி வழி...

(Photo by CC Licence, Thanks neoliminal)

தலையில் இருந்து

தொப்பி பறித்து

தலையில் அணிந்து

"சல்யுட்" என்கிறாள்.

வயிறு தவ்வ சிரிக்கிறார்

காசி ஏட்டையா.

"கடையை பார்த்துக்கிறேன்

நல்ல டீயா சாப்பிட்டு வாண்ணே"

தலை கலைத்து சிரிக்கிறாள்

டீ கடை மாரி அண்ணனை.

வசவு சொல்லி சிரிக்கிறார்

மாரி அண்ணனும்.

"என்னத்தை பார்க்கிற

நானும் பொம்பளைதேன்"

வேறு முகத்தை தெறிக்கிறாள்

திரும்பி பார்க்கும் யுவதியிடம்.

நீதிமன்ற சுவற்றை

கீறி

துளிர்க்கிறது

வேம்போ

விருட்சமோ.

பயந்து பயந்து

பார்த்துக்கொண்டிருக்கிறேன்

வெறும்

காட்சியை.

தைரியமாய்

வாழ்ந்துபார்த்துகொண்டிருக்கிறது

தீரா

வாழ்வு.