சாயமழை

(Picture by CC licence, Thanks Greig)

மழை கசறி கொண்டிருந்தது.

சுடுகாட்டு கொட்டகையில்
ஒதுங்கி இருந்தான் மேய்ப்பன்.

கடைவாயில் நுரை பறிய
ஊறிய புற்களை தின்றுகொண்டே
வால்களில் மழையையும்
விரட்டிக் கொண்டிருந்தன
எருமைகள்.

செவ்வந்தி பூ
பொதிந்து கிடந்த
பிளாஸ்டிக் பையிலிருந்து
ஒட்டாமல் இறங்கிகொண்டிருந்தது
சாயம் பாரித்த மழை.

என்னவோ மேய்ப்பனுக்கு
நினைவு வந்தது.
நேற்றிரவு மனைவிமேல் வீசிய
முதலாளி வாசனை.

இதை எதையும் அறியாது
எருமையின் கொம்பில்
வந்தமர்ந்தது
நனைந்த தேன் சிட்டொன்று.