ஆச்சு. நன்றி ஜெஸ்வந்தி! வாங்க அனுஜன்யா போகலாம். பயணம் சுவராசியபட ஒரு நிகழ்வை கேளுங்கள்..
ஒரு நாள், சைக்கிளை பூட்டி சாவியை தொலைத்து விட்டேன்.
"சங்கிலிட்டே கொண்டு போகலாம்டா பத்து நிமிஷத்திலே திறந்துருவான்." என்று நண்பன் ஒருவன் சொல்ல கொண்டு போனோம்.
நண்பன் சொன்னது போல் பத்து நிமிடத்திற்கும் குறைவில் சைக்கிளை திறந்து தந்தார் சங்கிலி. போக, அடித்து செப்பனிட்ட சாவி மாதிரியான ஒரு சாவியையும் கையில் தந்தார். கூலியை கொடுத்து அத்துடன் நான் வந்திருக்கலாம்தான். சிற்பம் செய்தவரை சும்மா அனுப்ப இயலாது என்னால் என்பதால் நண்பனிடம்,
"சங்கிலி அண்ணனுக்கும் சேர்த்து மூணு டீ சொல்லுடா"என்று சொன்னேன்.
"அப்பு...நீங்க இருங்க நான் போய் வாங்கிட்டு வர்றேன்"என்று உற்சாகமாகி, மூன்று தேநீர்களை கம்பி வலையில் தொங்க செய்து கொண்டு வந்தார்.
சங்கிலி அண்ணனின் முகம் தேநீரைவிட சுவராஸ்யமாக இருந்தது. சும்மா நிற்க வேண்டாமே என்று நினைத்த நான், "எப்படிண்ணே தொழிலெல்லாம்?" என்று கேட்டேன்.
"ஏப்பூ கேக்குறீக...சின்ன வயசுல விளையாட்டா தொடங்கினது...இப்ப கஞ்சி ஊத்துதுதான் என்றாலும்...எங்க சைக்கிள் தொலைஞ்சாலும் போலீஸ் என்னை வந்து கொண்டு போயிருது.. யாரு சைக்கிளை தூக்கிட்டு வந்தா?ஆள் எப்படி இருந்தான்? என்ன சைக்கிளுன்னு போட்டு குடைஞ்சுரு வாங்க...சில நேரம் அடி படுறதும் உண்டு."
"இதென்னடா வம்பா போச்சு. ஏன் அடி வாங்கணும்..கேக்கும் போதே யாருக்கு திறந்து கொடுத்தேன்னு சொல்லிற வேண்டியதுதானே"என்றேன் ஆறுதலாக.
"யாரைன்னு சொல்றதுப்பு..நம்ம தொழிலை பார்ப்பமா,ஆளையும் அடையாளத்தையும் பார்ப்பமா?பேரம் பேசி சாவி பூட்டுறாங்க. செஞ்சு கொடுத்த மறு நிமிஷம் சிட்டா பறந்துருவாங்க. உங்களை மாதிரி நின்னு டீ வாங்கி கொடுத்து பேசிக்கிட்டுருந்தா அடையாளம் தெரியும்தான்" என்றார்.
"வாஸ்த்தவம்தான்" என்றபடி என் சைக்கிளின் சகல அடையாளங்களையும் கூர்ந்து கவனித்து, "நல்ல வேலை நம்ம சைக்கிள்தான்" என்று நண்பனிடம் சொன்னேன்.
சங்கிலி அண்ணனும் சிரித்தார்!
வாஸ்தவத்தில், சங்கிலி அண்ணனுக்கும் எனக்கும் மெல்லிய ஒன்றுணர்வு இருக்கு அனு. இந்த பதிவுலகம் எனக்கு ரொம்ப புதுசு. பின்னூட்டம் வழியாக, அவர்களின் வீடடைகிறேன், அவர்களின் பின்னூட்டம் வழியாக அவரவர் வீடடைகிறேன். சங்கிலி அண்ணன் சொன்னது போல், "உங்களை மாதிரி நின்னு..டீ வாங்கி கொடுத்து..பேசிக்கிட்டு இருந்தால் அடையாளம் தெரியலாம்தான்" என இங்கு நானும் சொல்ல விரும்புகிறேன் அனு.
ஜெஸ்வந்தி எனக்கு தந்திருக்கும் விருதிற்கும் நீங்கள் தந்திருக்கும் விருதிற்கும் நிறைய வேறுபாடுகள் உள்ளது. அது, பதிவு லக நண்பரை தேர்வு செய்வது. அதில் நிறைய சுதந்திரம் உண்டு. இது சுவராசிய பதிவினர் விருது. உண்மையில் சுவராசிய பதிவரை தேர்வு செய்ய சற்றும் அருகதையற்றவன் அனு நான். ஏனெனில், கடந்த பதினைந்து வருடங்களாக... நான் மிகவும் நேசித்த, நேசிக்கும் இந்த இலக்கிய உலகின் முன் வாசல் பின் வாசல் அறிய இயலாமல் போய் விட்டது. நான் ஏற்கனவே சொன்னது போல், பின்னூட்டம் வழியாக தளம் தளமாக போய் வாசித்ததில் நான் ஒன்றுமே இல்லை என்றே உணர்கிறேன். அவ்வளவு பெரிய உலகம் விரிந்து கிடக்கிறது. நுழந்து வெளிவர வெகு காலம் பிடிக்கும். மிகவும் விரும்பிய தளங்களில் கூட வெறும் ஒரு கவிதையை வாசித்த நேரமின்மையும் என்னிடம் இருக்கிறது. இப்படி ஒரு சூழலில்... இந்த சொற்ப காலங்களி ல், நான் என்ன தெரிந்தனோ அது குறித்தும், அதன் சுவராசியம் குறித்தும் குறிப்பிட என்னால் இயலும்... இதை எல்லாம் ஏற்க நீங்கள் தயாரெனில்,...
இவர்களிடம் அவ்வளவு கொட்டி கிடக்கிறது...
அவர்கள்...
இன்னும் அனேகர் உளர். விதிகள் என்னை அனுமதிக்க காணோம். மற்றபடி நிறைய அன்பும் நன்றியும் அனு.
எல்லோருக்கும் அன்பு நிறைய!
பா. ராஜாராம்
