மஞ்சுவிரட்டுக்கு போக
ஆறேழு காரணங்கள் உண்டு.
மரமேறி நின்று மாடணைய
பார்ப்பது ஒரு காரணமென
கொள்ளலாம்.
கொல்லையில் நுழைந்தால்
சாராயம்.
வாசலில் நுழைந்தால்
கறிச்சோறு
எல்லாவீட்டிலும்.
வாடாமல்லி
பூச்சூடிய சிறுசுகளை
டிராக்டர் வண்டிகளில்
வேறெப்போதும்
காணகிடைக்காதுதானே.
ஆலை கரும்பு தின்று
சக்கையை
மச்சான்களின் மேல் எறிய
மச்சினிகளும் வருகிறார்கள்.
ஐஸ் வியாபாரிகளின்
அதட்டல் மீறி
ஹாரன் அடித்து சிரிக்கிற
சிறுவர்கள்
வேறொரு ஓவியம்.
பிரியம் தவறக்கூடாதென
போகலைன்னா ஆத்தா கோவிக்கும்
காரணங்களை காட்டி
இடுப்பு குழந்தைகளோடு
வந்து சிரித்து
"இறங்கி புடி....ஆம்பளை"
எனச்சீண்டும்
கன்னக்குழி கறுப்பிகளும்
காணக்கிடைப்பதுண்டு கூடுதலாக.
போக,
வேறு சிலவும் உண்டு.
ஆனால்...
நான்தான் சொன்னேனே
மஞ்சுவிரட்டுக்கு போக
ஆறேழு காரணங்கள்தான்
உண்டென.
