புதிர்ப் பொழுது

புதிர்


(Picture by cc licence, Thanks FontFont)

கடைசியில் ஒரு கேள்வி
மிஞ்சியது.

பதிலை மாற்றி அமைத்துப்
பார்த்தேன்.

ஒரு பதில் மிஞ்சியது.

கேள்வியை பதிலாகவும்
பதிலை கேள்வியாகவும்
பொருத்திப் பார்த்தேன்.

அப்பவும்
ஒரு கேள்வி பதில்
மிஞ்சியது.

பேசாமல் அக்கேள்விக்கு
அப்பதிலை திருமணம் செய்து
வைத்து விட்டேன்.

கேள்வி மிஞ்சும் போதெல்லாம்
பதில் தானாகவே பொருந்திப்போய் விடுகிறது.

***

பொழுது


(Picture by cc licence, Thanks Orange tuesday )

வாசலில்
சைக்கிள் நிற்கிறது.

சைக்கிள் நிழல் சரிந்து
வாசலில் கிடக்கிறது.

நிமிர்ந்து நிமிர்ந்து நிழல்
சைக்கிளுக்கு வந்து விடுகிறது.

சரிந்து சரிந்து சைக்கிளையும்- பின்
வாசலையும்கூட தாண்டுகிறது நிழல்.

பிறகு சைக்கிள் மட்டுமே
வாசலில் நின்று கொண்டிருக்கிறது.

--ஆனந்த விகடன். (இந்த வாரம்)
நன்றி சுகுணா,விகடன்!