பிராப்தம்

(Picture by cc license Thanks William)

போதும் என்பதை
சொல்லத் தெரிவதில்லை.
வேணும் என்பதும்
அது போலவே.

ஒரு மூக்கு துவாரத்தில் நுழைந்து
மறு மூக்கு துவாரத்தில்
வருகிறதெப்போதும்
கயிறுகள்.

தலையாட்டல்களில்
ப்ரியங்களை விட
பயிற்சி உதவுகிறது.

அப்புறம் பழகிப் போகிறது.

டிங் டிங் ஓசையும்
தட்டில் விழும் அரிசி மணிகளும்.

அப்பன் பிள்ளை

(Picture by cc license Thanks mckaysavage)

சேவுக மூர்த்தி என்ற
'குண்டக்க மண்டக்க' மூர்த்தியை
தேடிப் போயிருந்தேன்.

பூட்டியிருந்தது வீடு.

ஒட்டிய சந்திலிருந்து
ஓடி வந்த சிறுவனொருவன்
மூர்த்தியை ஒத்திருந்தான்.

மூர்த்தி மகனாடா என்றேன்.

இல்ல...
வந்து...
அது வந்து...
என்றெல்லாம் இழுத்தவன்
மூர்த்தி எங்கப்பா என்று
ஓடிப் போனான்.

மேற்கொண்டு

மூர்த்தியையும் வேறு பார்கனுமாவென

திரும்பினேன்.

**