என மற்றும் என்

(Picture by cc licence, Thanks Madaboutasia )

அவரை எனக்குத் தெரியும்
உங்களுக்கும் தெரியும்
யாருக்குமே தெரியும் அவரை
அவருக்குத்தான் தெரியாது
நமக்கெல்லாம் அவரைத் தெரிகிறதென
அவர் யார்?

என என என
விடுகதை விடுகிறாள் மகள்.

எனக்கு விடை தெரிகிறது என்பது
ஒரு சந்தோசம்.

அதை விட சந்தோசம்

என் என் என் மகளை
எனக்குத் தெரிகிறது என்பது.


நன்றி பண்புடன்

கோயில் வீடும் ரேசன் கார்டும்

(Picture by cc licence, Thanks Entrelec)

கண் மூடி கை தொழுது
நிற்பவளின் பெயர் எக்ஸ்
எனக் கொள்ளுங்கள்.

கை தொழுது கண் மூடாமல்
அவளைப் பார்ப்பவனின் பெயர்
ஒய் என எடுக்கலாம்.

அடப்பாவி என ஒய்யை
இருட்டுக்குள் இருந்து வெறிப்பவனை
நான் சொல்ல வேணாம்..

நீங்களே சொல்லி விடுவீர்கள்
வீணாப்போன கடவுளென.

***

நன்றி அதீதம்

ரௌத்ரம்

(Picture by cc licence, Thanks Mckaysavage)

நடக்க முடியாத காரணம் காட்டி
கோவில் திருமணம் காரியத்திற்கு
வீட்டிலேயே விட்டுப் போய் விடுகிறார்கள்.

குழந்தைகளை பார்த்துக் கொள்ள
என் கிழவியும் வேணும் போல.

சாப்பாட்டிற்கு
கட்டி வைத்த இட்லி துவையல்.

பேச்சுத் துணைக்கு
பேப்பரும் அணிலும்
மைனாவும் குருவியும்.

பின் மதியத்தில் மட்டும்
அடங்காத ஒரு சுவராசியம்.

புறக்கணிப்பும் உதாசினமும்
குளிரக் குளிர..

திண்ணையில் நின்றபடி
சிறுநீர் கழிக்கலாம்.

***

நன்றி அதீதம்

சரித்திரம்

(Picture by cc licence, Thanks Ahmed Al.Badawy)

எல்லாவற்றையும் இழக்க
ஒரு மனசு வேணும்.

வழங்கவும்.

அம்மனசிடம் ஒரு குரல் உண்டு
கரகரவென்கிற உப்புக் குரல்.

கேட்க விருப்பமா?

எழுந்து நடங்கள்.

ஆளரவமற்ற பாலத்தை
தேர்வு செய்யவும்.

அடர் நிசியெனில் நல்லது.

புகைவண்டி நேரங்களை
குறித்து வைத்திருப்பீர்கள் எனில்
உத்தமம்.

பாலத்தில் ஏறி நின்று
புகை வண்டி வருகிறதா எனப் பார்க்கவும்.
போதும்.

தவ்வும் முன்பு கேட்டீர்களா?

உங்கள் தலையை வாங்கிய தாதிப் பெண்
வெளியில் ஓடிச் சொன்னாள்
நீங்கள் ஆண் எனவோ பெண் எனவோ.

குதூகலமாக
கரகரவென்கிற உப்புக் குரலில்.

நீ

(Picture by cc licence mckaysavage)

ஒரு காற்று போல
வீச்சு போல
இன்னெதென்று சொல்ல முடியாத
ஒன்று போல
கடந்தாய் நீ.

குறிக்கிறேன்,

லிரில் சோப்பு, சாம்பார்
சைக்கிள் பால்ரஸ்
எலக்ட்ரிக் வயரில் சிக்கிய பட்டம்
கொஞ்சூண்டு ஆணியில்
சுத்தும் பம்பரக் கயிறு
பாம்பு கொத்திய புளிய முத்து,

சாம்பார்
லிரில் சோப்பு சாம்பார்.

கிரிக்கெட் கவிதைகள்

1. பெவிலியனுக்கு திரும்பாதவர்

இழுத்துக் கொண்டு
ஓடிப்போன தங்கமுத்து மாமா
அத்தையை சாகக்கொடுத்த பிறகு
திரும்ப வந்து விட்டார்.

இப்ப அத்தை மட்டுமே
ஓடிப் போனவளாகவே
இருக்கிறாள்.


--ஆனந்த விகடன். (இந்த வாரம்)
நன்றி சுகுணா,விகடன்!


2. ஆல் - அவுட்

மேலிருந்த
கண்ணீர் அஞ்சலிக்காரனை
எட்டவில்லை போல.

கீழிருந்த
குடும்பத்தார்களை
கழுதை மென்று கொண்டிருந்தது.

--ஆனந்த விகடன். (இந்த வாரம்)
நன்றி சுகுணா,விகடன்!


3. நாட்- அவுட்

கொண்டோடி மாடு
என அழைப்போம்
செத்துப் போகும் முன்பு வரையில்
சுந்தரை.

அப்புறமெல்லாம்
சுந்தர்தான்.

ரகசியம்

யாரிடமும் சொல்ல முடியாத
ஒன்றை என்னிடம்
சொல்லப் போவதாக சொன்னாள்.

என்ன வென்பதையும்.

யாரிடமும் சொல்ல முடியாததாக
இதில் என்னவிருக்கிறது
எனத் தோன்றியது.

கேட்கவில்லை​.

என்னிடமும் இருந்தால்தான் என்ன
யாரிடமும் சொல்ல முடியாத ஒன்று?

##

டிஸ்கி : கூகுள் பஸ்'சில் இந்தக் கவிதைக்கான தலைப்பை வைத்தவர் நம் தினேஷ்குமார்(முகிலன்), முகிலன், நன்றி!

மாற்றுப் பாதைக்கான கை காட்டி

தனிமை படுத்தப்பட்ட
மிக புராதன குரலோசையில்
விழித்துக் கொள்கின்றன புலன்கள்

கிளி கொஞ்சிய குரலுடனும்
பதை பதைப்புடனும்
இழுத்துச் செல்கின்றன தெருக்கள்.

பசும் மரங்களிடை
ஆழ் சுழியிடை
பழகிய வழியிடை

ஓட்டம் காட்டி சற்று
கை பிடித்து சற்று
பின் தங்கி சற்று

நடு நடுங்கி, ஒடுங்கி
சாகப் பிடித்தும்
பிழைத்துக் கொள்ளும்படியே
வாய்த்து விடுகிறது.

இதையெதையும் அறியாது,

பார்க்காமல் போகச் சொல்லி
இந்த முறையும் இறைஞ்சுகிறது
அக்குரலுக்கான பார்வை.

----கல்கி (இந்த வாரம்)
நன்றி கதிர்பாரதி, கல்கி

மூன்று தலைமுறை சாவி

(Picture by cc licence, Thanks Stevendepolo)

அம்மா மாதிரியே
சாவி வைத்திருக்கிறாள் இவளும்

அம்மா திறந்த
கதவையே திறக்கிறாள்

நெட்டுப் பத்தி, பட்டாசாலை
என்பாள் அம்மா
ரேழி, ஹால்
என்கிறாள் இவள்

மற்றபடி
அம்மா மாதிரியே
சிரித்து அழுது சோறு பொங்கி
கதவைப் பூட்டிக்கொள்கிறாள்

என்ன ஒன்று

திண்ணையில் தூங்கிய அப்பத்தா
சாவியைத் திறகுச்சி என்றாள்
சாவியை சாவி என்றாள் அம்மா!

--ஆனந்த விகடன். (இந்த வாரம்)
நன்றி சுகுணா,விகடன்!

தீர்ப்பு

(Picture by cc licence, Thanks Ajay Tallam)

அவர்கள்
சந்தித்துக் கொள்வதாக
ஏற்பாடாயிற்று.

அவள் சார்பாக சிலர்
இவன் சார்பாக சிலர்.

பேசித் தீர்க்கவியலா
பிரச்சினை எதுவுமில்லையென
நம்பினார்கள் பேசினார்கள்.

பேச்சு தோல்வியுற்றபோது
குழந்தை யாரிடமிருப்பதென்பது
பேச்சாக மாறியது.

குழந்தையிடமே கேட்பதாக
முடிவாயிற்று.

தீர்ப்பை வழங்கும் முன்,
அழுது கொண்டிருந்த ஆயாவை
கண்ணுற்ற குழந்தை...

அழத் தொடங்கியது.


--ஆனந்த விகடன். (இந்த வாரம்)
நன்றி சுகுணா,விகடன்!

தோழி

(Picture by cc licence, Thanks Akash_Kurdekar)

ஹென்றி வாத்தியார்தான்
துப்பாக்கி சுட சொல்லித்தந்தார்.

முதல் என்பதால்
பெட்டை கொக்கு சுடுவது
வேட்டைக்காரன் சாஸ்த்திரம் என்றார்.

காடு, வயல்
வயல்க் காடென
பெட்டை கொக்கு தேடி
சுற்றி அழைத்தார்.

கொக்கை கண்டதும்
பெட்டைதான் சுடு என்றார்.

சுட்டதும் பறந்த
கொக்கை பார்த்ததும்
மல்லிகா நினைவு வந்தாள்.

தீபாவளி துப்பாக்கிக்கே
செத்து செத்து விழும் மல்லிகா.

--ஆனந்த விகடன். (இந்த வாரம்)
நன்றி சுகுணா,விகடன்!

தொடங்கி முடிவன

(Picture by cc licence, thanks Manish Bansal)

ஒன்று

மழை பிடிக்குமா?
குழந்தைகள்?
பட்டம் ஏன் பறக்குது தெரியுமா?
மருதாணிக்கு இங்கிலீஸ்ல என்ன?
சிகரெட் பிடிப்பீங்களா?
கவிதை எழுதும் போதுமா?
என்றவள்,
பேசாமல் உங்களையே
லவ் பண்ணியிருக்கலாம்.
என்றாள்.

இரண்டு

வெள்ளியோடு வெள்ளி எட்டு
சனி ஒம்போது நாளாச்சு,
கோபமாய் நீ பேசாமல் இருந்து.
என்று பேசும்போது புலம்புகிறாய்.
இடையில் கிடந்த,
சனி,ஞாயிறு,திங்கள்,
செவ்வாய்,புதன்,வியாழன்,
வெள்ளி,சனியை..
எப்படி இப்படி தாண்டிப் போகிறாய்?

மூன்று

குழந்தைக்கு சோறூட்டிக் கொண்டே
நிலவை பார்த்தாள்.
நினைத்துக் கொண்டார் போல
பாலா என்றாள்.
குழந்தை திரும்பியது.
உன்னை இல்லைடாவென
கண் நிறைந்தாள்.

நண்பர்கள்@ஆண்டிமடம்.காம்

(picture by cc licence, thanks Procsilas)

எப்ப தொடங்கப் போகிறாய்?
என்றுதான் தொடங்கினார்கள்.

தொடக்கத்தில் மலைப்பாக இருக்கும்.
பிறகு அதுபாட்டுக்கு போய்க் கொண்டிருக்கும்
என்று ஊக்கினார்கள்.

ஆளாளுக்கு எதையாவது சொல்வார்கள்.
இந்தக் காதில் வாங்கி
அந்தக் காதில் விடுவது நல்லது
என்று வேறு ஆற்றுப் படுத்தினார்கள்.

செய்வது என
முடிவு செய்து விட்டால்
முட்டித் தூக்கணும் போல.

உங்களிடம் சொல்ல
ஒன்று விட்டுப் போயிற்று

முன்னதாக,
எதையாவது தொடங்கணும்.
எதை தொடங்கலாம்?
என்று கேட்டதற்குத்தான்...

எப்ப தொடங்கப் போகிறாய்?
என்று தொடங்கினார்கள்.

அப்பன் பிள்ளை

(Picture by cc license Thanks mckaysavage)

சேவுக மூர்த்தி என்ற
'குண்டக்க மண்டக்க' மூர்த்தியை
தேடிப் போயிருந்தேன்.

பூட்டியிருந்தது வீடு.

ஒட்டிய சந்திலிருந்து
ஓடி வந்த சிறுவனொருவன்
மூர்த்தியை ஒத்திருந்தான்.

மூர்த்தி மகனாடா என்றேன்.

இல்ல...
வந்து...
அது வந்து...
என்றெல்லாம் இழுத்தவன்
மூர்த்தி எங்கப்பா என்று
ஓடிப் போனான்.

மேற்கொண்டு

மூர்த்தியையும் வேறு பார்கனுமாவென

திரும்பினேன்.

**

கவிஞனில் திரியும் மனிதன்

(Picture by cc license Thanks runran)

திட்டமிடலைப் போன்றே
சோர்வேற்படுத்துகிறது
தொலைத்த பொருளின் நினைவு.

துக்கம் பிதுக்கி
திகைக்க வைக்கிறது
பின் மதியத்தில் கூவும்
ஒற்றைக் குயில்.

மலைக்க வைக்கிறது
விளக்கு பொருத்தி, திரியையும் தூண்டி
எண்ணையில் மூழ்கி
காத்திருக்கும் தீக்குச்சி.

"பூமழை தூவி வசந்தங்கள் வாழ்த்த.." என

பேருந்தில் பாடி வருகிற

கூலிங்கிளாஸ் காரரின் குரல் மட்டும்

ஏனோ பழகி விடுகிறது.

மண்டுகள் துப்பும் மொழி - 3

(Picture by cc license Thanks mckaysavage's)

தாத்தா பெயர் கொண்ட தம்பியை

சின்னவனே என்றழைக்கிற பாட்டி

என்னை வடுவா என்பாள்.

தண்ணி தர

மாத்திரை எடுக்க

கால் அமுக்க

கதை சொல்ல

எல்லாத்துக்குமே

சின்னவனேதான்.

தாத்தாவின் கதை சொல்லிக் கொண்டிருந்த

நாளொன்றில் பாட்டியிடம் கேட்டான்

தம்பியும்,

"தாத்தா ஓடிப் போயிட்டாரா பாட்டி?"

பிறகெப்போதும்

கதை சொல்லி பார்க்கலை பாட்டியை.

தம்பியைக் கூட

சின்ன வடுவா என்றழைத்தாள்.

இவரை பார்க்கணும் மக்கா நீங்க

க‌ட‌லை நேர‌ம்

ப‌ண்ப‌லை நிக‌ழ்ச்சிக்கு
தொலைபேசி
அழைப்பு வ‌ந்த‌து

ப‌ழ‌கிய‌ பெண்
மாசமாகிவிட்ட‌தாக‌வும்
கருவை
என்ன‌ செய்வ‌தென்று
தெரியாம‌ல்
குழ‌ம்புவ‌தாக‌வும்
சொன்னானொருவ‌ன்

கலவரமாகி அழைப்பைத்
துண்டித்த அந்த
இள‌ம் தொகுப்பாளினி
அடுத்த‌ பாட்டை
ஒலிப‌ர‌ப்பினாள்

யாருக்கும் டெடிகேட்
செய்யாம‌ல்.

***
சுத்த‌ம் சுகாதார‌ம்

ந‌ன்றாக‌
மென்று த‌ந்த‌
வெற்றிலை

எலும்பில்
உறிஞ்சி எடுத்த‌
ம‌ஜ்ஜை

க‌டித்துப்
ப‌ங்கிட்ட‌
க‌ட‌லையுருண்டை

பாதி முடித்த‌பின்
த‌ந்த‌
பால் ஐஸ்

குடும்பத்திலும்,
ந‌ட்பிலும்
நெருக்க‌மாக‌
இருந்த‌
பொழுதுக‌ள் அவை.

**

தோற்கும் முயற்சிகள்

நெரிசலில் சிக்கிய
ஆம்புலன்ஸ்

பெரிய துணிக்கடையில்
தனியே அழும்
சிறுவன்

வேலையில்லாமல்
இருக்கும் பழைய
நண்பன்

பிரச்னையால் மூடப்பட்ட
தொழிற்சாலை

ப‌ண‌க் க‌வ‌லையோடு
ஐசியு வாசலில் வருந்தும்
மகன் / ம‌க‌ள்

இவைகளைப் பார்த்தும்
எதுவும் செய்ய‌முடியாம‌ல்
கவனம் திருப்பும்
என் முயற்சிகள்
அத்தனையும் கண்டிப்பாக
தோற்கும்.

**

இது அவரின் சில பருக்கைகள். படையல் வேணும் எனில் அவர் தளம்தான் போகணும்.தளம் இது...

http://roughnot.blogspot.com/

அறிமுகத்திற்கு நன்றி கணேஷ் கோபாலசுப்பிரமணியன்!

யாம் பெற்றேன் இன்பம்! இன்பம் தொடரலாம்...