பால்ய சினேகிதனும் சில வெயில் நாட்களும் - ஒன்று

(Picture by cc licence, Thanks Ryemang)

ஷண்முக பவன் வாசலில்தான
அவனைப் பார்த்தேன்.

அடையாளமே தெரியவில்லையாம் நான்.

என்னை நான் இல்லாவிட்டால்
என்ன செய்வது என்று
யோசனையாய் இருந்ததாம்.

நல்லவேளை நான் நான்தானாம்.

முன்போல் இல்லையாம் ஊரும்.

ருக்மணி மில்ஸ் வந்ததில் இருந்தே
ஊர் மினுக்கிக் கொண்டு விட்டதாம்.

டேவிட் வாத்தியார் செத்துப் போனாராம்.

இவனும் நானும் வைத்த வில்வங்கன்று
மரமாகி விட்டதாம்.

எல்லாம் பேசி மீள்கையில் சொன்னான்
நான் எல்லாவற்றையும் மறந்துவிட்டேனாம்
ஒரேயடியாய்.

இவன் இல்லையாம் ஸ்ரீதர்
இவன் தம்பியாம்.

- '94- பிப்ரவரி கணையாழி.

***

பி.கு.

இந்தப் பயணத்தில், நண்பர் G.ரவி, கணையாழியில் வந்த உங்கள் கவிதை ஒன்றும், ஜூனியர் விகடனில் வந்த 'காதல் படிக்கட்டுகள்' கட்டுரை ஒன்றும் என் கோப்பில் இருக்கு ராஜா" என்று கொடுத்து உதவினார்...நான்தான் எல்லாவற்றையும் தொலைக்கிறேன் போல. நண்பர்கள் முதற்கொண்டு! நண்பர்கள் பத்திரமாகத்தான் வைத்திருக்கிறார்கள் . எனை முதற்கொண்டு! நன்றி ரவி!

**